Cui che o sin

Il Consorzi si propon di stâ daûr a chescj obietîfs:

Favorî e disvilupâ l’insegnament te provincie di Gurize di cors di lauree e di diplomis universitaris, di scuelis di specializazion, di centris di ricercje e di studi e di cors di perfezionament supuartant la furnidure di locâi, di bens e di imprescj che a coventin par inviâ, par davuelzi e par incressi lis lôr ativitâts.

Proviodi ancje a mieç di acuardis cui Istitûts superiôrs e cui Ents di ricercje nazionâi e forescj ae istruzion, al funzionament e ae gjestion di cors, seminaris, laboratoris, centris e istitûts di ricercje di nivel alt e scuelis di specializazion;

Promovi e finanziâ programs di ricercje di fâsi in provincie di Gurize ancje cu la colaborazion di Centris, Istitûts, Laboratoris, Dipartiments de Universitât dai Studis di Nova Goriza, di Triest e di Udin e di altris Universitâts o Centris di Ricercje pussibii;

Promovi la realizazion di servizis universitaris e parauniversitaris, integrâts, tal câs, cui servizis de coletivitât e ancje la gjestion di Cjasis pal Student, lozaments e servizis varis;

Dâ aes Universitâts che a ufrissin cors di diplome e di lauree tal Isontin, contribûts finalizâts ae lôr realizazion e disvilup e concedi par chest fin, strumentazions e imobii di proprietât dal Consorzi;

Inmaneâ iniziativis significativis pe promozion de imagjin dal Pôl Universitari di Gurize e pe valorizazion di cheste presince academiche, stimolant ancje la residenzialitât;

Ufrî un supuart organizatîf e finanziari par iniziativis cualificadis, pensadis par favorî i scambis fra il Pôl Universitari di Gurize e altris istituzions nazionâls e forestis;

Meti in vore cualsisei iniziative buine a fâ cognossi la realtât universitarie te provincie di Gurize;

Promovi e favorî la integrazion des ativitâts dal Pôl Universitari di Gurize cul sisteme economic, culturâl e scolastic dal teritori, ancje a mieç di servizis di consulence e di informazion;

Promovi e favorî la partecipazion des realtâts sociâls, culturâls e economichis de Regjon, in colaborazion cu lis universitâts ai progjets e ai programs de Union Europeane, ancje a mieç de publicazion di tescj di caratar sientific e di ativitâts sperimentâls specifichis de realtât sociâl e culturâl de Provincie.

Stimolâ la nassite di cors di formazion post universitaris di cualifiche alte e specialistics cun riferiment particolâr ai setôrs professionâi carateristics de realtât o des potenzialitâts dal isontin, rinfuarcint la lôr vocazion e specificitât.

Cun chest fin il Consorzi al cjape sù un rûl centrâl te programazion di dutis lis iniziativis universitariis e sientifichis che si davuelzin sul teritori, sedi dal pont di viste struturâl che par chel che al tocje i servizis e lis ativitâts didatichis, formativis, sientifichis e culturâls specifichis che a jentrin tes competencis statutariis.

Tal sostignî lis ativitâts universitariis e sientifichis culturâls, il Consorzi al met une atenzion particolâr tal valorizâ la specificitât storiche culturâl dal “Isontin”, riferiment impuartant tal disvilup di relazions pacifichis e zovevulis cui Balcans e cu la aree dal Mediterani orientâl.

Il Consorzi, te sô struture di vuê, al rapresente une modifiche al Consorzi istituît cul art.25 de Leç n. 142/1990 che za chê volte e trasformave, cul art. 60 de Leç 8 di Jugn 1990, n. 142 e cun modifichis seguitivis, il prin Consorzi costituît cul decret dal Prefet de Provincie di Gurize prot. N. 6122/I dal 29.07.1987 e cussì clamât "Consorzio per la promozione e lo sviluppo degli insegnamenti universitari, di scuole speciali e di attività scientifiche e di ricerca nella provincia di Gorizia".