Vivi a Gurize

Ativitâts a Gurize

IL LIBRI DES 18.03

“Il Libro delle 18.03”, event leterari origjinâl che chest an al met in pîts la seste edizion dimostrant di rapresentâ un dai plui impuartants events culturai dal Isontin, juste di chest an al tacarà la sô colaborazion ancje cul Consorzi Universitari e i students, che a podaran dâ il lôr contribût par sielzi i libris di presentâ dentri de manifestazion. Il libri al è un compagn di viaç par cui che al dopre il tren e i traspuarts publics e la idee e je chê di svilupâ un progjet di culture in moviment che e passe framieç de citât, a pît o cui mieçs publics ae discuvierte di lûcs, potenzialitâts e energjiis gnovis. La rassegne e tacarà tal Avrîl che al ven come simpri te sale gjavade di pueste dentri de stazion dal tren e intun bus itinerant; e intint rinfuarcî ancjemò di plui il rapuart fra la citât e i siei abitants promovint la partecipazion dai sets gurizans e de popolazion studentescje ancje di Nova Gorizia. La iniziative cussì preseade e ufrìs ancje la oportunitât di integrazion jenfri i citadins e i students des trê universitâts, dongje dal fat che e permet ai citadins di ricjapâ possès di spazis tradizionalmentri no destinâts ae culture. La sperance e je chê di podê tornâ a fâ un concors leterari pai zovins dai 17 ai 24 agns par promovi la didatiche universitarie di Gurize in dutis lis scuelis mediis de Citât e in ducj i altris ateneus.

Par vê plui informazions: www.illibrodelle1803.it o pûr la pagina Facebook.

___________________

DONADÔRS DI SANC - ADVSG

Al è impuartant promovi la culture di dona sanc ancje fra i students universitaris di Gurize e ve la possibilitat di promovi iniziativis comunis. Par sensibilizâ la popolazion universitarie che e je a Gurize, il president dal Consorzi al al à proponût dai incuintris informatîfs in colaborazion cu la ADVSG e la Conference dai students. Il president de ADVSG al à anticipât impuartantis inziativis: la istituzion di une borse lavôr par une tesi che e svilupi i aspiets de comunicazion e des motivazions che a sburtin a fâ chest at di solidarietât e la zornade mondial de donazion. Ai 11 di Jugn di fat si fasarà la donazion coletive di sanc in place Transalpina, lûc simbolic di integrazion che al viodarà la partecipazion di donadôrs talians e slovens, unîts dal at dal don, e la probabile partecipazion dal president de Regjon Renzo Tondo.

Par plui informazions va pagina Facebook.